高盛坐盤交易部門向來戰績彪炳，但都有睇漏眼。舊年佢哋蝕讓多筆槓桿貸款，其中一個買家正係無寶不落嘅股神巴菲特，投資唔夠半年，就賺超過兩成半。
令高盛睇漏眼嘅，係佢哋喺舊年十一月攞出嚟賣嘅報章出版企業Lee Enterprise一筆8,500萬美元貸款，呢間公司已陷入困境，所以每一美元面值貸款，只係賣65美仙，較高盛嘅買入價約80美仙為低，搞到交易錄得至少1,300萬美元損失。
然而，巴菲特投資旗艦巴郡旗下部門買入後迄今已升至82美仙，仲高過高盛嘅成本價添。
據《華爾街日報》嘅報道話，巴菲特今次買到件寶，過程有啲「鬼祟」。話說喺金融海嘯時股神曾高調入股高盛，最終勁賺逾15億美元，據悉，巴菲特舊年洽購呢筆貸款時，係透過花旗接觸高盛表達興趣，根本冇披露身份，直至今年三月先至曝光，並喺上星期加碼買入500萬美元貸款。
印象中，高盛投資好少有咁失準，據講係由於喺金融改革法案籠罩下，佢哋舊年初決定收縮持有規模約40億美元高風險貸款組合嘅交易櫃台，而沽貨行動大部分於舊年夏天當歐美市場陷入低潮期間進行，難怪巴菲特可以喺高盛手上買到筍貨啦。