絲絲講場：魔童睇完書做大刁
「魔童」王維基（Ricky）專心做電視大亨，將城市電訊（01137）嘅香港同加拿大電訊業務賣晒，擺明孤注一擲，唔好理將來係咪成功，淨係呢個膽識，真係唔係個個有，究竟邊個咁把炮，壯大佢個膽？
周文耀都讚本書助啟發
佢尋日出席花旗舉辦嘅活動，就吐出真相，佢話最近做嘅「重要決定」，係受到哈佛大學哲學教授Michael Sandel寫嘅《正義──一場思辨之旅》呢本書嘅啟發。雖然佢冇講係邊啲「重要決定」，但畫公仔唔使畫出腸，實係講緊賣電訊業務呢單大刁啦。呢單刁咁矚目，絲絲無論點問，Ricky點都唔肯講多句，所以絲絲都攞唔到啲乜嘢啟發喇。
呢本書內容係探討何為「正義」，賣產同正義有乜關係，絲絲唔係生意人，所以唔多明，只可以肯定，喺財經圈入面，好多人都有睇過呢本書，好似數碼港主席周文耀，尋日不約而同咁提起呢本書好有啟發性，但有冇啟發周生做啲「重要決定」，佢就冇講。
馬時亨唔答係咪做司長
商務及經濟發展局前局長馬時亨（Fred）尋日同Ricky一齊，做花旗活動嘅嘉賓，佢話Ricky依家做咗傳媒大亨，應該每年捐100萬畀花旗呢個活動做獎金，仲話如果Ricky捐100萬，佢就捐10萬喎！Ricky就話，如果阿Fred肯拍番輯《局長生涯》，仲捐晒啲出show費出嚟，佢就一齊捐；兩位大人物果然都好幽默吓！
呢排，成日都有人估阿Fred，係下一任嘅財政司司長，佢就回應話，「做唔做FS（Financial Secretary）？我係FM（Fred Ma）喎。」
余絲韻