港股連跌三日後，受外圍喘穩帶動，昨日輕微高開，午後開始發力向上，收市時升幅擴大至186點，主板成交527億元。
A股續升，國企指數追升，恒指昨日升0.9%，國指就升足1.5%，推介的中企大和牛（69992）升13%才散場，可以睇多一陣。相較最近一次浪頂，即一○年十一月份，國指現水平累挫25%，同期恒指跌18%左右，位於次按危機核心美國市場的道指則只較其歷史高位低一成，可見國指最落後，跌得多亦代表未來有機會彈得多，彈唔彈得到要睇內地政策會否有利低位徘徊多時的中資股。
人民銀行剛公布三月份新增貸款1.01萬億元人民幣，按年增3,320億元人民幣，高於預期，中央鬆手一啲，市場當然表現好一啲，加埋有關深圳金融改革的消息，都有助紓緩市場情緒，但情緒可否轉為更樂觀行動，就要睇埋今日公布的GDP。觀乎資金流向，股友繼續買大（睇好）唔願走，周三流入衍生工具好倉的資金有4,366萬元，淡倉錄得2,381萬元資金流走。
大市反彈，成交未配合上升是美中不足之處，連輪場也一樣是成交牛牛皮皮。窩輪全日錄得64.79億元成交額，較周三跌3.1%，牛熊證成交70.28億元，按日升2.6%。
記得早前投行界盛傳人行第二季減存款準備金率的機會好高，估計短期內會再炒作此主題，可繼續留意內銀及內保，低位小注開Call既無傷大雅又值博。昨日中國銀行（03988）升1.9%，值得留意。
今年九月五日到期的中行渣打購（16008），行使價3.28元，引伸波幅31.5%，實際槓桿11.7倍。
Handsome哥