Market Insight：電訊資產價值提升

三月份新增貸款，是一一年一月份的1.042萬億元人仔以來，最高的單月紀錄，M2廣義貨幣供應增長，亦由13%升至13.4%，向着人行全年14%增長目標行近一步。美銀美林經濟師陸挺認為，新增貸款數字顯著反彈，意味着中國經濟最壞時刻，可能在三月份見底，貸款需求由一、二月的低水平反彈，預計情況會持續幾個月，第一季經濟增長，可能會稍高於佢原先估計8.3%。

恒指連跌三日後，尋日反彈186點收報20,327點，新增貸款數字一出，期指好友再下一城，把握最後十五分鐘，將三月期指挾高過百點，由低水轉炒高水，收報20,383點；經過昨日反彈，恒指前日在20,188至20,297點留低的下跌裂口完全補回，技術上，再彈的目標係21,760至20,035點跌浪的0.236及0.382反彈阻力，分別在20,442及20,694點。

放大圖片

放大圖片

摩笛唱好碧桂園

遭到南韓三星及蘋果iPhone等智能手機逼到埋牆角，夕陽王國諾基亞份成績表連續兩季見紅，隔晚仲發盈警，股價跌到十五年新低，首當其衝是富士康（02038），股價逆市跌7.4%，原因係其四成生意來自這芬蘭巨人。大摩又再吹起摩笛，話十五日內碧桂園（02007）上升機會大，理由包括資產折讓42%屬吸引，短期主要推售不受限購令影響地區新盤，以及早前已伸手，資金壓力無其他對手咁大，一年目標價睇4.3元，碧桂園尋日股價升1.2%報3.21元。

城市電訊（01137）以50億元賣掉手上現金牛─電訊業務，全身投入免費電視生意，單係套現筆錢，就比目前市值36.3億元高出三成七，公司表明將當中20億元，以特別股息派番畀股東，等於每股至少攞到2.5元，消息公布後股價掃高去到5.61元，街外博財息兼收勇士唔少，可惜尋日嚟個反高潮，焗住要做電視大亨！話說回頭，電視一向係燒銀紙玩意，特別息收完之後，揸住25億元玩免費電視有幾「襟燒」？

電視係燒錢遊戲

撫心自問，今日傳統電視行業，面對愈來愈多跨媒體挑戰，古勝自己和唔少朋友收睇YouTube頻道的時間，遠多過傳統免費電視。電視本身係高資本高風險生意，遠的不提，壹傳媒（00282）在台灣搞電視蝕到嘔，廿年前投資數以十億的有線電視，近幾年焗住天價續約英超播映權留客，成績表經已四年見紅，亞洲電視一個老闆蝕夠換第二個，電訊魔童靠甚麼破除港人開電視例必㩒「1」的習慣？

儘管過往在長途電話及寬頻都創造奇迹，但老實講今次古勝真係唔太樂觀，畀我揀，做開台初期大灑銀彈下的首批觀眾，都唔做佢股東，計落派息後，大約相較剩餘現金值折讓35%，以一間唔知蝕幾耐的生意而言，仲未夠吸引。

交易中，也帶來一些投資啟示，資訊爆炸當下，電訊服務逐漸變得不可或缺，無論固網、無線網絡收費經歷長時間的壓力後，開始見底回升，買家對電訊資產價值的前景看好，城電這間香港第二大寬頻商，擁200萬客戶，去年純利3.1億元，計一計收購者出價，相當16.1倍市盈率，或者投資回報大約6.2%。睇番數碼通（00315）及和電香港（00215），以一二年預期盈利計，盈利回報率約5.8及6.9%，當然在下絕對相信，郭家同李家唔會輕易割愛，但至少現水平入市，同大孖沙睇中香港寬頻預期回報，相距不遠，如果電訊業前景真係咁好，大家可以齊齊分享成果。

墓園股當睇少瓣

講開又講，昨日吸引古勝眼球的股份，當中亦包括仁智國際（08082），此股宣布向股東施行「供」刑（二供一），供股價折讓超過五成，股價只跌三成已算執番身彩。其實呢類墓園股概念無限，但件件都係向下炒，香港咁多股票炒，當睇少瓣啦。

古勝