孖妹S檔案：財金Apps十強幫你搜

彩兒：高妹，你部手機有咩財金Apps好用呀？

高妹：「Money18」夠晒貼市外，其餘嘅財金Apps林林總總，我都想知邊隻「好使好用」！

致富證券資產管理部聯席董事 莊志豪	致富證券助理分行經理 謝少淵	放大圖片

彩兒：你有咁多金融「友達」（朋友），佢哋打滾咗咁耐，實有推介啦！

高妹：好！一於睇吓佢哋部電話有咩搵食Apps！

股市類Apps

致富證券助理分行經理謝少淵（Michael）嘅手機得兩個財金Apps，由於公司有報價系統，故好少用電話睇股價。不過，他喺上班前會透過「Stocks」了解一下美股ADR嘅表現，兼且留意納指、道指及標指嘅上落波幅，可預先感受吓當天港股嘅氣氛！

唔只美股同港股息息相關，A股嘅影響力亦不容忽視。致富證券資產管理部聯席董事莊志豪（Eric）推介「大智慧」及「同花順」，都係有關A股資訊嘅Apps，提供A股即時報價、內地重要指數表現、以及內地財經新聞。可惜孖妹買唔到A股，「大智慧」及「同花順」嘅作用似乎唔大噃？係吖！Eric解釋，佢自己都買唔到A股，但係A股走勢直接影響港股表現，而Apps內嘅A股投資建議也可作參考之用呀！

匯市類Apps

孖妹不嬲都鍾意炒股搵食，賺吓私己錢，但近排個市難玩，咪望吓匯價攞靈感囉！Michael話佢平時用開「Swiss Forex」，因可追近國際期貨走勢。即使Michael無炒匯，但都經常留意歐元、日圓同澳元匯價發展，因歐元可反映歐債嘅發展趨勢，而日圓係傳統嘅資金避難所，其匯率高低可顯示市場嘅避險情緒孰強孰弱，另澳洲乃資源國，澳元表現可反映資源供應嘅穩定情況，都直接影響港股走勢o架！而Eric則用開「Trade Interceptor Forex Mobile」，係另一熱門外匯Apps，當中亦包括串流報價及圖表分析，亦有相關財經新聞提供。

新聞性Apps

孖妹一直都係用「Money18」去check股價，唔好話我嘅「賣花讚花香」，「Money18」的確方便易用，有齊即秒報價、即時新聞及投資推介，真係唔驚走漏眼呀！行內唔少朋友都係「Money18」嘅粉絲，AMTD證券及財富管理業務總經理鄧聲興（Kenny）就係其中之一，他經常外出做訪問，途中梗要睇吓即時新聞！而「Money18」嘅新聞資訊較為全面，實可幫助了解財經時事呢！除此以外，「Bloomberg」及「CNBC」Apps亦係人氣之選，可以話係金融界必備Apps，其國際財經新聞資訊齊全且集中，仲有世界各地的指數表現，大部分資訊都可從中獲取！

金市類Apps

今年金價反覆做好，孖妹當然要多多留意啦！英皇金業投資營業部助理副總裁陳藝文（Katie）推介「NetDania Forex」。Katie話呢個Apps以查看匯價同金價為主，仲有圖表作分析之用，非常全面，惟iPhone個螢幕唔夠大，所以睇圖表嘅時候會較為辛苦！仲有呀，「NetDania Forex」有齊歐美各大指數表現，幫助了解歐美大市趨勢。

Katie另外仲推介咗「Kcast Gold Live！+」，主要用作分析商品價格，除了金、銀等熱門金屬外，仲有白金及其他化學原料價格，而圖表分析亦清楚明確。Katie經常外出見客同舉辦講座，就係靠「Kcast Gold Live！+」嚟更新金價消息喇！

高妹：彩兒，以上十大人氣財金Apps，你有幾多個先？

彩兒：老實講，我只係得「Money18」同「Bloomberg」咋！就等我拿拿臨去下載埋另外八個，再話畀你聽好唔好用啦！

高妹、彩兒

若有料報畀高妹同彩兒或有嘢問，可電郵money.biz@opg.com.hk