Market Insight：內銀PE勁縮玄機

美國三月非農職位增加12萬份，遠差過經濟師預測的中位數20.5萬，同先前連續三個月高於20萬的經濟復甦「最低要求」相比，僅及六成。如非善忘，應記得聯儲局主席伯南克早前提出，今次美國經濟復甦，就業市場表現相對滯後，失業率回落速度明顯不及聯儲局預期。華爾街當時把言論解讀成就業數字愈差，QE3推出可能性愈高，今趟數據堅差，好友仲係阿Q咁視而不見，當美國2.9%的CPI無到，繼續炒高通脹下照推QE3？抑或令去年十月開始的升浪告一段落？會係美股短期一大考驗。

估值便宜實有原因

上星期五美股休市，不過電子期貨跌1%，交投活躍得多的十年美債孳息，數據後急插至2.05厘，跌穿去年十二月到今年二月的2.1厘多次阻力位，同上個月高位2.4厘比較，累積調整幅度唔細，可見市場風險胃納全線收縮，醒目錢明顯棄股買債。最衰是一不離二，中國三月份CPI比市場預期高，去到3.6%，進一步寬鬆貨幣政策看來無望，中港股市今日沽壓不容忽視。

近期中外大行策略師大合唱一樣，睇好內地今年經濟表現，樂觀者更估全年GDP增長去到9%，更甚話A股見底，同中央放棄保八的淡淡地預期，大相逕庭。A股平均預期市盈率只得9.5倍，但阿媽教落便宜莫貪，平一定有平嘅理由，睇睇人民幣一年期不交收合約，兌美元由二月初低位6.2505，跌到昨日6.3343，比現貨價6.3086仲要低，反映一年後人仔唔係升值，而係貶值0.4%，即係同大部分人長期升值的共識有分別。

要知人民幣不交收合約參與者除炒家外，主要為貿易商對沖出口外匯風險之用，肯定較紙上談兵的吹水專家貼市，故情況令人不安，今日內地公布三月貿易數字（估計收窄到31.5億美元逆差），到底首季出口增長放緩有幾嚴重，應可見端倪。

中國經濟開始放慢

事實上，去年下半年以來內地經濟增長開始放慢，中國經常帳盈餘佔GDP比例已由前年的5.1%降至去年的2.7%，先前官方下調今年GDP增長嘅目標，實乃務實之舉動。

上周四A股復市表現偏穩，市傳中央會繼續透過不同方式向魚缸開水喉，讓長錢流入以穩人心，月內「降準」的可能性亦不能完全抹煞。上周四幾大內銀股因溫總話要「破壟斷」而捱沽。另見中資券商股表現逆市靠穩，成交較活躍的有中信証券（06030）、國泰君安（01788）及光大控股（00165），成交唔多但逆市報升的就有海通（00665）、申銀（00218）同第一上海（00227），不妨留意長假後良好氣氛能否延續。

工行有波幅冇升幅

溫總提出內地大銀行壟斷的言論，引起內銀股一陣震盪。老實講，中國十一年前加入WTO，開放金融市場，今日外資搶到四大銀行幾多生意，大家其實係心知肚明，四大國有銀行佔貸款市場份額八成以上，去年總利潤6,236億人仔，每日從同胞身上賺到17億人仔，唔好講話其他以民企形式銀行唔入流，強如經營歷史及國外網絡發達得多的外資銀行，只能停留細眉細眼小額入股，以至極有限度分行經營。

或者大家仲係好難有概念，四大行有幾巨？舉例，一○年美國全國GDP係14.6萬億美元，四間最大銀行富國、摩通、美銀及花旗總市值5,480億美元，約等於GDP的3.75%，睇番歷史上發展成熟市場，比例介乎3至5%好合理；反觀中國一○年GDP係5.93萬億美元，是美國嘅四成左右，即使近年股價麻麻，四大行市值依然高達6,900億美元，相當於當地GDP的11.6%，由數字顯示，四大行相對經濟規模是偏向過大，說是壟斷一點都不過分。

隨着內地金融改革推進，大型銀行高利潤好光景仲有幾耐玩？溫總言論是試水溫，抑或有決心向富可敵國的四大行開第一槍？筆者認為兩個成份皆有，股市是最有效投票機器，○七年初第一大行工行（01398）股價已見5元，五年後股價有波動無升幅，市盈率（PE）由最高峰38倍跌到今日6.9倍，正正道出，市場對內銀股暴利時代隨時告一段落，有晒心理準備。