一間上市公司，凡係有重要人事辭任，都會畀市場形容為「跳船」，然後有理無理沽咗先算，尤其係名人，入局時引發名人效應令到股價勁升，走時就預咗要「還」。被尊稱「民企之父」嘅張化橋，入咗民生國際（00938）只係六個月多啲就辭任，尋日股價就曾經勁跌近18%。
絲絲仲記得舊年九月，張化橋高調開記者會，要入去民生做行政總裁兼執行董事，當日股價一度勁升14%，收市就倒跌11%，當日收報0.56元；而尋日民生最低見0.395元，收報0.435元，跌愈9%。
講真，呢排咁多核數師辭任同董事辭職，市場真係好驚又刮民企風暴，而且張總份合約係為期三年，點知只係過咗六個零月，張總就以「發展其個人業務」理由辭職。
當時張總主要係入民生幫佢發展小額貸款業務，張總更加自掏腰包，由佢持有嘅慢牛資本斥5,000萬元認購民生附屬民生金融9%權益，同時民生嘅附屬民生國金，又同張總做董事長嘅廣州市花都萬穗小額貸款公司，訂兩年戰略合作協議，由萬穗向民生國金提供小額貸款服務。
話時話，張總入咗民生以嚟，民生嘅股價都跑輸大市，小股民都好失望，依家張總另謀去路，或者可以有更好發展呢。