絲絲講場：創興集團怕咗「創興」
新股上市臨門「撻Q」唔出奇，不過，因為公司中文名被指假冒，最終要刪除中文全名、向投資者補充招股章程，先至可以上市嘅橋段，就真係無幾多喇。生產設備組裝商創興集團（01322）即將改為「CW Group Holdings Limited」，仲強調唔會採用任何中文名稱，務求斬腳趾避沙蟲。
俗語有云「唔怕生壞命，最怕改壞名」，新股創興喺舊年十二月，揀咗其中一間主要附屬公司「創興機械設備（上海）」，做埋集團嘅中文名，估唔到幾個月後就收到封律師信，被一間香港上市銀行指公司中文名稱涉及侵權，真係世事難料。睇番創興集團份招股書，發覺公司對中文名稱「創興」商標註冊上，並無任何風險披露，可以理解公司對呢次「官非」始料不及。
上市要緊 只用英文名
事後創興集團都諮詢過吓法律意見，認為對方指控「只有少許理據」，公司則「擁有強而有力的抗辯理由」，不過創興集團現階段以上市為大前提，所以上月底已與該銀行簽訂和解協議，包括三個月內將中文名稱更改為唔包含「創興」字眼嘅名稱；又承諾喺補充招股章程中刊登免責聲明，澄清雙方並無任何關連。
不過，雙方協議「創興」及「Chong Hing」名稱等地區範圍暫時只限香港，修訂後掛牌日子為下周五（十三日）。