絲絲講場：揸過億退休 霍嘉治唔憂
滙豐控股（00005）高層人事變動頻仍，集團重臣亦有榮休之時，滙控執董兼歐洲、中東及非洲業務主席霍嘉治做埋今個月，就會退下火線，轉身繼續做多一年非執董，前前後後可以袋住151萬股滙控退休，市值過億。
親歷海嘯世紀供股
其實霍嘉治服務咗滙控三十七年，最為大家熟悉嘅都係○七至一○年做滙豐亞太區行政總裁時，喺香港陪大家度過金融海嘯同世紀大供股喇。
霍嘉治為滙控立下唔少汗馬功勞，喺八個國家做過管理層，滙控主席范智廉都話佢做工商業務為集團帶嚟最大利潤，霍嘉治嚟緊再做非執董，滙控管理層會繼續向佢取經，但佢仍會繼續出任多個職位，包括英國滙豐銀行主席、HSBC Latin America Holdings （UK） Limited主席，以及中東滙豐銀行董事。
穩袋151萬股滙控
佢轉職非執董，董事袍金為每年9.5萬英鎊。不過，佢仲揸住一大筆滙控股份，退休依然好豐足。據滙控公布，佢依家揸住超過95萬股滙控，仲有逾55萬股係有限制同有條件獎勵股份，加上參加滙控傳統嘅儲蓄優先認股計劃嗰4,529股，袋住超過151萬股滙控退休。以尋日收市價計，總市值超過1億元。據聞霍嘉治興趣多多，高爾夫球、釣魚、古典汽車和歷史都係佢杯茶，退休後，有錢有時間，可以慢慢玩啦！
余絲韻