Market Insight：內房磚頭 始終有價

中國三月份官方PMI及美國ISM指數報喜之後，中國三月份非製造業指數亦升到58，放完假之後中國首季GDP會唔會有驚喜？自從阿爺話放棄「保八」之後，坊間好似當今年GDP一定「冇八」咁款，但目標同實際真係兩回事，所以大家唔好咁快睇死。

本地地產股周二大反彈，新地（00016）兩位老細出來亮吓相起碼可以令投資者個心定啲，但喺地主股回升之時，朝早升過兩蚊托起大市嘅中移（00941）則由升轉跌，個市不能因一日反彈而樂觀得太早，喺上周二亦曾挾升378點，但跟住亦要再尋底。

放大圖片

放大圖片

昆能抽水為搞正業

昆侖能源（00135）同金界（03918）加入抽水行列，反應當然係前者比後者好得多，金界係大股東賣舊股，昆能擺明發展新業務，所以股價低開後慢慢回升。燃氣股由舊年至今都係最強板塊，但單計近期強勢就非水泥股同航運股莫屬，水泥股勝在估值低，中國建材（03323）嘅管理層「自爆」今年盈利可增長三成，現價一一年PE得5.7倍，賺多三成嘅話，一二年PE豈不是得4.44倍？

每日例行要做民企股檢討，周二不少暴跌民企股翻生，例如永暉焦煤（01733）、達進東方照明（00515）等，但永暉條數睇到你一頭霧水，依家先覺得插紅旗嘅穆迪有先見之明。繼續沉淪嘅有銀基（00886）、人和商業（01387）等，旭光（00067）彈一日就玩完，今次內傷之後應該醫番都嘥藥費。

步入薄利多銷年代

內銀同內房都屬有危有機類別，周二內銀升得唔錯，但升得最勁係內房，一放長假就傳出減存款準備金率（RRR）消息，事實上，今年內地樓價雖下降，但整體氣氛好過舊年下半年好多，三月北京新樓成交比二月升咗4成，一來發展商肯減價，積累咗幾個月之購買力開始爆發，二來內地放寬首套房按揭，證明中央「有打有壓」。

雖然阿爺三令五申遏制樓價，但業內認為只係口硬心軟，樓市上牽地方債務同銀行不良貸款兩大炸彈，下涉眾多周邊行業，包括代理、廣告、建築材料、電器、傢俬、燈飾大大話話幾十種，中國剩得推動內需呢招去保增長，只要樓價唔好咁離譜的話，阿爺都會隻眼開、隻眼閉。

中國人對買樓情有獨鍾，皆因銀紙可以亂印，股票亦可以印公仔紙，地皮始終供應有限，而祖國同胞薪酬上漲之速度其實跑贏通脹，所以遲早有承接。地產商無疑已過咗盆滿缽滿時代，但只要肯薄利多銷、貨如輪轉嘅話，依然大把錢途。不過，地產業無疑要經過洗牌階段，財力不足者要賣資產，而龍頭公司則可以執平貨，所以幾時都係買龍頭股最穩陣，何況中國海外（00688）同華潤置地（01109）呢類大粒佬波幅亦一啲都唔細。

如果都係覺得藍籌股升幅唔夠喉，又驚民企股條數有問題嘅話，亦可以考慮中海外個仔中海宏洋（00081），上個月仲發咗22億元CB，肯定今後會大舉買地。

電企基本因素改善

除了磚頭股吸引避險資金進駐之外，周二個別電力股低位亦有買盤吸納，其中中國電力（02380）及華能國際（00902）分別升9.76%及3.7%。內地推行居民用電階梯式累進電價的政策方向甚為明確，多個城市正積極制訂方案，相信今個夏季會見到試點，加上煤價升勢已經受到限制，電力股的基本因素雖然不算得上十分之吸引，但無可否認已有所改善。

古勝認為，在電力股之中，華潤電力（00836）勝在擁有完善的產業鏈，且華潤系公司的管治水平亦叫人揸得安心，乃實力之選。其股價仍停留在13至16元水平的波幅區內上落，首季升至通道頂部遇阻回落，次季可留意在13元水平，分注作中線收集的機會。

古勝