金占士剛上京走咗一轉，返到嚟就睇到有內房公司將北京地皮賣畀本港富豪，大家可能會問，乜內地唔係錢多到水浸咩？點解會畀機會「井水」流到「大河」？金占士可以同大家講，其實內地一班富豪依家都幾水緊，當中一啲吃得開嘅富豪就充當中間人「助人自助」。
大家都知道，京城有三多，就係官多、富豪多同美女多，呢排富豪並唔係無錢，而係過去十年間，怕執輸大量透支去「圈產」，當中最多就係地產，響銀行資金嘅幫助下，等於做槓桿孖展，一個蓋冚九個煲，早期有啲唔生性，借咗銀行錢又去炒股，一旦國策同經濟有變，資金鏈即時斷裂，所以成日聽到內地咁多爛尾嘢。
由於大家爭嘢，加上籍貫出身派系等問題，一定積落好多仇口，所以金占士知道有一班比較吃得開嘅二、三線富豪，做個中間人，當中唔少係出名頭腦口齒都咁伶俐嘅江浙滬少爺，佢哋同內地同香港富豪都可以交到朋友，近年好多單大刁，涉及香港富豪嘅或多或少都有佢哋幫手。
其中一位京城大少笑住同金占士講，北方人愛賭兩把，多年嚟好多北水都流到小小嘅濠江，希望水循環可以「南水北調」，總之唔理咩水，救到急嘅就係好水喎。