唔少名人利用自己嘅知名度嚟做善事，包括股神巴菲特，佢最近就化身環保使者，喺投資旗艦巴郡旗下建築用品公司Johns Manville個網站度呼籲，企業賺錢之餘，記得保護環境，因為破壞環境最終會累埋自己。
巴菲特話破壞環境唔能夠令企業取得持續競爭優勢，同埋滿足顧客嘅需要，帶動一家企業盈利能力嘅必要元素，除咗人才同埋社區，仲有環境。
股神之所以咁語重心長講環保，事緣Johns Manville曾經係美國最大石棉生產商，喺八十年代一連串指控石棉致癌嘅官司累到呢間公司喺八二年破產，○一年巴郡將佢收歸旗下，Johns Manville亦改變咗業務方向。
巴郡三年前收購美國鐵路王Burlington Northern Santa Fe嗰陣，巴菲特力讚火車係最環保嘅交通工具，佢入股生產電動車嘅比亞迪（01211）同埋發展可再生能源嘅康菲石油，亦都係出於熱愛環保。
講開又講，向美容產品直銷商雅芳敵意收購失敗嘅香水公司Coty，其智囊之一係備受巴菲特賞識嘅銀行家特羅特（Bryon Trott），呢位仁兄喺高盛做咗27年後，○九年自立門戶，開咗間叫BDT & Co.嘅顧問及投資公司，期間巴郡幫過佢一把！