曾經喺○六年登上內地「胡潤百富榜」首位，成為中國第一個女首富嘅玖龍紙業（02689）董事長張茵，係唔少事業女性嘅偶像，佢尋日出席博鰲亞洲論壇嘅時候同大家分享咗好多成功秘訣喎！
張茵先強調現代女性獨立嘅重要性，佢話，女人如果要靠老公養，講得難聽啲即係保母，家庭生活就會冇晒共同語言，所以女人一定要出嚟做嘢，要同老公分享社會上發生嘅事，同埋自己遇到嘅困難，佢仲話，如果女人淨係使錢，好易老o架！
張茵仲話最緊要係處理好自己嘅心態，例如遇到困難嘅時候，一定要拎出嚟同其他人傾，唔可以成日覺得自己啱晒，同埋如果盡咗力嘅話，就唔好再怪罪自己，應該瞓覺嘅時候就瞓覺。
創業咁耐總會有失意嘅時候，好似喺○八年，佢哋嘅廠房被形容為「血汗工廠」，雖然有百幾個記者走去廠房採訪，佢話既然心中有數，又點會驚記者踩場？最終呢一關都過咗，令佢更加相信，女性喺工作上遇到困難，最重要係擺平心態，否則好易有憂鬱症。