又到季尾，內地銀行近排為咗達到中銀監嘅存貸比率要求，出盡法寶搶存款。金占士聽聞，有啲股份制銀行開出超筍條件，如果你有辦法叫公司將過億現金存入間銀行，就可以長期「借用」間銀行全新嘅Audi豪華名車一部（圖為同品牌車輛）；至於私底下嘅「現金回贈」、「海外旅行」之類嘅好處，更加係層出不窮。
每次一到月尾或者季尾，內地銀行就要出盡法寶搶存款。除咗推出啲高息短期理財產品吸納普通客戶嘅資金之外，為咗完成存款考核，啲銀行對大客更加疏爽。一間江浙地區嘅農村信用社，為咗季末資金「一日遊」開出千分之四至五嘅佣金，有「資金中介人」計過條數，只要幫手拉到一億人仔存款，可以攞到四、五十萬，就算再回水一半畀個客，都可以淨袋廿萬。
今年銀行存款增長乏力，呢啲被業內稱為「資金駁腳」嘅中介人，生意就特別興隆，幾日賺嘅錢仲多過好多人打一年工。仲有人估，內地資金旱情喺近排都會持續，可能人行減多幾次存備金先有可能緩解到喇。
金占士