越秀地產（00123）主要業務包括發展、出售同管理物業，以及持有投資物業。雖然國家實施宏調，但集團靠住優秀嘅管理團隊，仍然令佢交到靚靚嘅成績表！集團近年調整過產品定位，發展出新型嘅營銷策略，喺咁多房地產股入面突圍而出，令銷售業績比其他人優勝。
集團定位清晰，穩固基地，一向都以珠三角為核心，以長三角、環渤海、中部地區為重點。集團有見宏調令土地市場持續調整，朝溫總所講嘅「合理水平」發展，所以靜觀其變，審慎購地，唔會買到現金流過低。呢點對內房股嚟講好緊要，因為如果手頭太緊，隨時畀人逼到要集資！
集團仍然維持「穩步發展」嘅方針，先奠定堅實嘅基礎，並不斷積極提高自己嘅開發建設技術，同時引入高增值元素，優化自己不同嘅項目計劃。喺公司內部方面，集團近年亦不斷改革，加強各部門嘅統籌協調力度。同期間，集團嘅建設項目亦穩步開展，以不疾不徐嘅速度累積優質貨量，待將來市場回暖時奮力出擊！
集團近年開始加快向全國化轉型嘅步速，不斷改革各個管理體系，引入先進嘅管理模式，令管治效率不斷提高，不斷打響品牌引入先進嘅營銷管理學理念，加大品牌嘅推廣力度。加上集團屬下聯營越秀房產信託基金（00405），上年總經營收入約5.22億元人民幣，增長7.8%，亦係集團另一筆收入來源。睇番數據，一一年盈利大幅增長4.59倍，市盈率2.26倍，息率約5.4厘！繼續追蹤、出發！
香港大學電子金融服務榮譽 助理教授 徐燦傑