內地嘅最高學府清華大學尋日正式成立「清華五道口金融學院」。「五道口」其實就喺北京中關村附近，佢最巴閉嘅，就係人民銀行研究生部嘅所在地，亦係中國金融人才嘅搖籃，地位相當崇高。新成立嘅學院，搵嚟全國人大財經委副主任吳曉靈擔任第一任院長，真係夠晒說服力。
人行前任副行長、中國證監會第一任主席劉鴻儒喺30年前成立咗人行研究生部，併入清華之後，人行研究生部亦會從此消失。五道口有「金融黃埔軍校」之稱，佢哋嘅畢業生創辦咗內地第一間法人股份制銀行、第一間上市公司、第一間證券公司、第一隻基金……
今時今日，由人行研究生部出身嘅菁英遍布內地金融界。做過人行副行長嘅吳曉靈，同現任副行長胡曉煉，以前就係同學。好似國務院發展研究中心金研所所長夏斌、廣州萬穗小額貸款公司董事長張化橋，都喺五道口出嚟o架。
由於五道口嘅教授都係兼任，資源同制度都追唔上時代，為咗唔影響個「朵」，所以要併入清華。吳曉靈話，佢會幫五道口平衡併入清華，所以任期唔會長。但為咗專心搞好教育，會趁換屆辭咗啲社會職務，淨係保留人大嘅身份。