絲絲講場：高盛印度開會順便遊埠
高盛呢個禮拜會開董事會，首次選址印度，足見佢哋對印度呢個市場何其重視。計埋印度，高盛班董事可以話已經集齊一套，講緊嘅係佢哋去齊金磚四國開會呢！
衣着輕便 內容密實
高盛阿頭布蘭克費恩分別喺新德里同孟買主持一連三日嘅會議，第一站係新德里嘅Leela Palace酒店九樓，按理高盛董事需要匙卡至入到會議場地，不過呢度保安認真麻麻，一般遊客冇匙卡都可以上到去八卦吓。班董事平時着到西裝骨骨，難得去到印度寓開會於遊埠，大多着上polo shirt和牛仔褲輕裝上路。
雖然佢哋對今次開會內容冚到實一實，但其實唔愁冇嘢傾，可以講吓前下屬史密斯早前大爆高盛醜陋文化單嘢啦，又可以講吓高盛涉嫌喺一宗能源購併交易有利益衝突單官司啦，仲可以傾吓下個月十七號出爐嘅首季業績添。
高盛○八年喺印度攞到牌照，一年前買咗間資產管理公司，又搵埋印度裔嘅「鋼鐵大王」米塔爾做董事。不過喺印度做投行冇着數，因為當地出名收費低。前年印度煤礦商Coal India掛牌，可謂當地歷嚟最大規模上市活動，但負責包銷嘅投行竟然冇肉食。