中國銀行（03988）同中銀香港（02388）兩母子，尋日一齊派成績表，最能吸引眼球嘅，除咗盈利同派息之外，管理層嘅收入都係焦點。絲絲雖然知道內地銀行高層嘅酬金一向都偏低，但係比較一下佢哋兩間母子公司高層嘅人工，都可以話係南轅北轍，再比較埋舊年賺嘅盈利，前者嘅人工佔盈利嘅比重，就好似地球上嘅一隻螞蟻，微不足道。
中行同中銀香港嘅高層，果真同人唔同命。根據尋日新鮮出爐嘅年報，中行舊年賺1,241億元人民幣，而中銀香港則賺204.30億元；中行董事長肖鋼舊年嘅報酬總額係106.25萬元人民幣，而中銀香港總裁和廣北則1,220.1萬元。
其實中行董事、監事同高級管理人員，加埋超過20人，舊年全年嘅總酬金僅2,326萬元人民幣，和廣北一個人已經及得上佢哋嘅一半人工。
比較一下身價嘅升幅，肖鋼都係輸畀和廣北，肖鋼嘅報酬只係升咗5.4%，和總就有20.4%嘅升幅，唔單只跑贏肖鋼，亦勁過一眾銀行界嘅一哥同一姐，好似星展集團執行總裁高博德，舊年嘅身價增9.93%至4,992萬元。
中銀香港舊年盈利創新高，而和廣北當然豬籠入水啦，但係佢都無待薄旗下員工，員工今年嘅花紅有望增加，惟人工嘅升幅則須視乎市場狀況而決定。
余絲韻