繼蘋果公司總裁庫克（Tim Cook）喺北京同北京市長會面之後，今次輪到facebook（fb）創辦人朱克伯格同埋佢女友Priscilla Chan現身上海。好多人都猜測，朱克伯格此行係尋求fb進入中國市場，不過金占士覺得佢首日嘅行程似拍拖多啲嘞，仲全程畀人喺網絡上轉載。
話說日前有上海市民見到佢哋兩位出現喺上海復興路，期間朱克伯格同Priscilla表現得非常似遊客，兩人攞個iPad出嚟查地圖，企喺街角手指指咁搵路。有途人想上前要求合照，但即時殺出6個保鏢組成人牆咁擋住，惟有離遠影佢兩個。之後佢哋又去咗好多上海景點，包括田子坊、新天地、南京路步行街等，都有唔少人將佢哋嘅相上載微博。
金占士細想，近排千億美元新股fb上市似乎阻滯多多，好似雅虎告緊佢侵權呢單官司就已經夠晒佢煩，怕且今次朱克伯格同女友齊齊到上海，可能都係乘機散散心，戀愛大過天咁！之不過金占士就覺得，朱克伯格咪掛住拍拖至得，嚟到上海，點都約番工信部啲高層吹吓水，點樣可以放生fb，等佢可以神州任我行，咁樣，fb上市嘅市值又點止嗰1,000億美元。做男人，都係事業為重，拍拖幾時都得啦！
金占士