作為中糧集團老臣子嘅寧高寧，尋日突然宣布辭任中國糧油（00606）董事會主席，即日生效，但係就會維持非執董一職，而頂替佢嘅係公司執董于旭波。絲絲對於佢突然離職就非常好奇，但公司又無作出詳細交代，寧高寧得53歲，又唔似係退休，絲絲就大膽估：莫非佢要「養好隻牛」？
話說寧高寧喺○四年底加入中糧集團後，就擔當多個要職，包括中糧集團有限公司董事長、Wide Smart Holdings Limited董事及中糧集團（香港）主席，統統係中國糧油嘅主要股東。佢目前亦都係中糧集團旗下嘅中國食品（00506）主席及執董、中糧包裝（00906）非執董。
獲中糧入主嘅蒙牛（02319），舊年創辦人牛根生退出後，寧高寧就接替佢嘅職務，擔任董事會主席兼非執董，蒙牛去年底再爆毒奶風波。近日管理層對業務嘅解說仲引起市場不滿，所以絲絲諗中糧阿媽委派佢去「養好隻牛」亦不足為奇，無理由買完又唔理佢o架嘛！加上，寧高寧往績彪炳，八七年開始効力華潤（集團），喺旗下嘅附屬公司有多個重要職務，九六至○四年間就係華潤總公司總經理添！搞好蒙牛呢個重任捨「佢」其誰呢？
余詩韻