早排去咗東南亞走訪，發覺東南亞近來受惠於全球化，發展一日千里。至於喺東南亞設業務嘅公司，喺香港都可謂十分獨特！金界控股（03918）主要業務在柬埔寨經營酒店同娛樂城NagaWorld。近幾年歐美國家經濟唔掂，亞太區同一眾新興國家成為增長動力！尤其東南亞一帶，龐大嘅造訪人數同消費，令佢哋嘅旅遊事業受惠不少。
睇番柬埔寨嘅旅業，一一年嘅遊客較一○年增約15%，合共約290萬人。凡來自越南嘅遊客入柬埔寨時，都有免簽證待遇，因此一一年來自越南嘅到訪遊客人數較一○年增加19%，合共614,000人。
金界近幾年定位清晰，不斷加強自己嘅核心優勢，不斷優化產品同服務，擴充同增加物業嘅主要博彩區，以及鎖定目標市場，加強客戶對自身品牌嘅認知度，同時優化公司嘅客戶細分策略，藉此提高收入同獲利能力。
公司近年專注大眾博彩市場去加強業務基礎，呢種策略令盈利不斷上升，屬可持續嘅業務經營模式。同時間，受惠於旅業發展，來自鄰近國家嘅到訪遊客不斷上升，令NagaWorld大廳賭桌生意興隆！同時間，對賭桌運作同注碼上限嚴加監管，研究唔同模式去提高博彩效率同速度，令大廳賭桌成為一個極佳收入來源。
集團數據亦十分靚仔！集團一一年度盈利增長108%，派息又慷慨，息率約6.4%！繼續追蹤、出發！