大家成日睇到「指數」呢兩個字，咁乜嘢係指數？國家統計局前任總經濟師、現任國務院參事室特約研究員姚景源好幽默咁話，「好似靚女，佢唔係一個指標構成，而係一綜合指標。所以，唔可以話眼大嘅就係靚女」。靚女一定要眼大大，但如果扁鼻、pizza面，就唔符合靚女呢個「綜合指標」喇！
佢話有次搭飛機，隔籬坐咗個港商，當面彈國家統計局嘅數據唔準。姚景源就話，「如果你覺得唔準，可以唔用。統計數據最基本嘅功能，係畀你學識睇趨勢。」
近年大家對通脹有切膚之痛，猛呻「邊個可以搵到一樣唔加價嘅商品呀？」姚景源直指「有好多喎」！十年前一部桑塔納嘅車要二十萬人仔，依家只賣幾萬蚊；二十三年前手機賣三萬大元、重三斤，仲要排隊等三個月攞貨。但大家唔會日日買手機、買車，但日日食飯，仲一日三餐，搞到大家餐餐都遇到通脹啫。