好多人發咗達，都會衣錦還鄉，有份情意結為鄉親父老做番啲嘢。有位地產界叔伯同金占士講，最近本來想同一位港澳富豪合作，響南區投幅地起番幢樓，畀佢啲拍檔同親友優先用成本價認購，可惜叔伯嫌無肉食，結果放棄咗，但就直豎拇指大讚呢對富豪父女都係有情有義之人。
呢位低調富豪一生傳奇，早年只係響南區搞吓生意仔，後來過梳打埠撈到風生水起。佢個女響外國畢業後搞房地產，其後就返嚟香港接咗個叔伯嘅經紀牌，點知更加青出於藍。
近年低調富豪都覺得當年跟住自己嘅拍檔親友年紀都大，無奈都同樣受到高樓價之苦，自己有錢，咁啱見到自己土生土長嘅南區有幅土地招標，個女亦好支持老竇，搵到金占士個做建築嘅叔伯傾，諗住合作買起塊地一條龍發展。
但叔伯同金占士講，依家起樓真係無肉食，而且富豪父女要求幅地唔起商場，唔發水，計實咗個價錢，即使畀埋叔伯入股，計實個價後入標都勝算不大，最後臨門放棄入標。不過叔伯就勁讚兩父女無諗過賺錢，純粹係對嗰區有感情，希望畀親友響條根處退休。
金占士