內地樓價過去幾年升到癲咗，估唔到百度老細李彥宏同競爭對手騰訊老闆馬化騰，會企埋同一陣線，喺個論壇上面齊齊將員工成本高漲嘅責任，推晒畀地產商。冇得上台辯解嘅華遠地產董事長任志強就話，係IT行業搵錢太易，推高樓價至真。
唔好以為任志強坐喺台下就發唔到炮，佢一邊聽一邊寫微博。當李、馬猛嗌樓價高，大炮就寫「美國嘅硅谷唔係成熟嘅大中城市，但中國嘅IT業，都走去最好嘅地方、買最好嘅樓，做IT買得起樓嘅人只得20幾歲，遠低於其他國家。」
佢又嘲諷IT業自稱「民工」，既唔使風吹雨打，又可以按時食飯，「邊似我哋日日喺地盤，晚黑12點仲做得啲乜？IT業賺錢太容易，利潤比做地產高幾十倍、幾千倍。」到個論壇結束時，佢繼續發炮，「馬化騰仲攞住房津貼。我哋邊個地產商享受人才津貼？太腐敗喇！」