Contract上面打多咗個零，就觸發一場官司。講緊嘅係一名叫赫伯特（Kai Herbert）嘅外匯交易員，佢一○年六月收到摩根大通offer，話出2,400萬南非蘭特（約2,422萬港元）年薪力邀佢過檔，赫伯特以為真係有咁大隻蛤乸隨街跳，結果佢由瑞士搬到約翰內斯堡，點知原來摩通當日打多咗個零，激到赫伯特告上法庭。
法官對赫伯特嘅遭遇深表同情，話當日發現2,400萬蘭特係個錯嘅銀碼，相信你個心頓時向下一沉喇。赫伯特當日知道銀碼錯咗，毅然唔去摩通報到，轉去瑞信度做，但輾轉之下變咗失業大軍，如今決定向摩通索償58萬英鎊（約712萬港元）。
摩通辯稱當日合同上出現列印錯誤，正確年薪銀碼係240萬蘭特，反指赫伯特竟然咁天真以為佢哋會出到一個執行董事級嘅價錢嚟請一個交易員，又話即使銀碼打錯咗，赫伯特依然可以接受呢個offer。
有就業顧問幫摩通嗰邊，話就算間行畀到咁多錢請個交易員，當中一定有甚具約束力嘅條款，唔排除有人明知份contract打錯，係咪都簽咗先。
余詩韻