銀行存款忽然多幾個零，聽到都想笑！社交塗鴉問答遊戲「Draw Something」開發商OMGPOP，創辦人福曼（Charles Forman）就係呢個幸運兒；但有人好唔好彩，摩根大通有個「準」交易員，收到份人工多咗個零嘅聘用合約，之後至知有人擺烏龍。一個畫多幾個零，一個就畫多咗個零，命運弄人也！
OMGPOP因為開發咗「Draw Something」呢款網絡遊戲，瘋魔全球，好快就畀Zynga睇中，出價達1.8億美元（約14億港元）。最開心嘅係佢嘅創辦人福曼，真真正正係畫出彩虹！佢同《紐約時報》講，OMGPOP賣盤畀Zynga之前，銀行戶口得番1,700美元，即係港紙萬三蚊度！
福曼六年前一手創立咗OMGPOP前身、網上紅娘嘅I'm in Like With You。佢坦言，成立原因純綷出於搞笑，佢無直接開發Draw Something。一年前，福曼離開咗OMGPOP另起爐灶，但仲keep住啲股份，佢無透露喺Zynga收購OMGPOP呢單deal中攞到幾多錢，不過消息話佢今勻穩袋至少2,200萬美元（逾1.7億港元），等於佢嘅存款多咗四個零，另加五百萬美元，Zynga可以話係佢嘅財神！
Zynga宣布收購OMGPOP後，福曼即刻拉大隊喺曼哈頓貴價酒店嘅ballroom搞咗個party慶祝一番。福曼好感慨咁話，第日去朋友仔嘅婚禮，終於可以揀套得體啲嘅衫出席喇。
余詩韻