財金達人：內地「合理樓價」得啖笑
無論股市定樓市，合理價位可以話有好多準則計，但其實又冇乜準則。中央高層早前話，內地樓價遠遠未返去合理價位，所以對樓市嘅調控都唔可以放鬆，坊間對點樣計算合理價位意見多多。近期有種比較流行嘅講法就認為，樓價同收入嘅比例約3至6倍就為合理區間。如果以呢個計算標準，怕且全國都無咩邊個地方可以符合「合理」呢個要求喇。
有位內房老闆同金占士講，發展商都唔多歡喜聽「合理」呢個字眼，佢認為每個城市嘅經濟、工資、產品都唔同，好難講咩先係合理。
樓價收入比率盼6倍內
以「天子腳下」嘅北京為例，樓價雖然話跌話跌，但係以郊區為主嘅普通住宅成交均價每平方米依家就賣緊1.8萬元（人民幣‧下同），以單位面積100平方米計，樓價就要180萬。北京舊年全年城鎮居民嘅人均可支配收入就係32,903蚊人仔。以一家三口計，年收入即係12萬左右人仔，未計利息，180萬人仔嘅樓，樓價同收入嘅比例就已經成15倍！同依家市場講嘅3至6倍，又係咪好唔合理呢！
其實咩先係合理價，相信都真係好難有個定論，中國人鍾意磚頭，對擁有物業有情意結，歸根究柢，供求關係都係一個重要嘅因素。
金占士