絲絲講場：富昌郭俊偉開舖遇同鄉
近日市況雖然chok到不得了，但係富昌金融尋日就開佢哋第一間分行。絲絲聽聞話，有「翻版林志玲」之稱嘅港姐林莉（Carrie）會擔任剪綵嘉賓，梗係要去湊吓熱鬧啦！
盛讚林莉 啱做代言
嘩！真人確係好「索」，連絲絲都睇到眼甘甘。不過又唔係好明點解會請佢做嘉賓，點解主席郭俊偉會同Carrie扯上關係呢？原來佢哋係同鄉呀，仲唔係「他鄉遇故知」！佢哋一見面就「家己冷」（潮州話）咁樣打招呼，潮州人是也，郭主席仲叫佢做「潮州美人」添。
郭主席同絲絲講，之前未見過林莉真人，但就話佢咁靚，話唔定搵佢做代言人咁話！
郭主席對今年股市樂觀，相信會好過舊年，而講到開舖目標，佢就話要睇吓反應先，「目標開10間呀？」佢就以哈哈大笑回應話：「好呀好呀！」
絲絲聽Carrie講，咁啱佢哥哥又係做金融呢行，所以佢將成副姑婆本畀咗哥哥投資，佢仲話哥哥好誠懇、信得過，唔知佢個portfolio係咪好掂呢？