估吓有邊單投資一旦錯過咗，會賺少成2,000億人仔（下同）咁多呢？答案就係民生銀行嘞（01988）。不過，聯想控股主席柳傳志話「絕對唔後悔」。
柳傳志前日出席一個公開場合時，同台下近千人分享咗佢嘅投資心得。佢話喺九六年民生銀行準備增資時，佢係第一個獲准投資嘅。假如當初掟一個億入去，今日大概會獲得2,000幾億嘅回報，但柳傳志最終冇投資到，而佢並唔後悔。
點解可以咁灑脫嘅？柳傳志講，喺創業過程中，身邊不斷有咁樣嘅投資機會，係好事定壞事，真係講唔埋。或者揀咗民行賺到錢，電腦呢條路又做唔成，又或者最後乜嘢都冇把握到。佢又對台下專做技術創業嘅人寄語，對於想做嘅嘢，係要反覆諗清楚，然後就要堅定不移咁行落去。如果完全唔諗，好可能失敗o架！
聯想控股貴為投資旗艦，十一年前向科大訊飛投資咗2,533萬元，○八年科大訊飛順利喺深圳中小板上市，呢單投資今日嘅回報都有50到60倍，表現好好。你話如果淨係識得呻賺少幾多，仲有冇機會賺大錢呢？
余絲韻