曾經喺二○○四年，畀稱為「股壇長毛」嘅David Webb睇中，推介做「聖誕禮物」嘅嘉利國際（01050），喺近日宣布購買主席何焯輝擁有嘅婚紗及攝影業務，代價成4,500萬元，並用發行新股支付。
見到愛股嘉利國際又再不務正業，同埋小股東嘅股權因為發行新股而被攤薄，惟有喺自己個網站貼文炮轟，呼籲少數股東齊齊投反對票，否決呢單咁貴嘅「婚禮」，仲話因為少數股東無發言權先會發生呢件事。
喺短短幾年間「由愛變恨」，David Webb話除咗因為金融危機，衝擊客戶對嘉利國際嘅產品需求下跌，同埋中國製造業成本上升之外，由○九年一月開始更停止公布季度業績添。
David Webb話嘉利國際以前主要從事科技器材業務，但近年就開始不務正業，連內地房地產都涉足。
好似宜興個廠房咁，經過兩年嘅生產運作，突然又話欠缺完善基礎設施、供應商唔集中就暫停運作。
David Webb話投資者一般都鍾意公司專注自己嘅核心競爭力，而唔係用嚟作為主席嘅「寵物」，所以呼籲少數股東企出嚟否決今次呢單交易。
余詩韻