按揭證券公司嘅中小企融資擔保計劃（SFGS）推出接近十五個月，市場反應不一，有啲銀行甚至只係掛名參與行，一直都唔係好肯幫客做，不過見到政府會補貼推出新產品，就突然積極咗，係咁話自己支持中小企，開始抽水賣乖。
話說金占士見有間外資行，成個集團上年到依家都喺SFGS參與名單入面，但係取態就好似隱形咁。不過間行近期就突然好積極，話全力支持SFGS，推出埋一系列新優惠畀舊有SFGS，金占士就好奇怪上年年尾中小企想撲水時，又唔見間行咁樣出手幫客。
金占士收到風，舊年按證中小企融資擔保計劃收到235宗申請，主要都係兩間外資行撐住，夾埋做咗差唔多一半，仲好積極咁講意見出嚟，希望再做好啲幫吓客戶。
等到中小企融資擔保計劃優化完，政府喺今年中又會再推出新產品，由政府擔保八成，仲要大減保費，一直隱形嘅嗰間外資行，好明顯咁出嚟抽水賣乖，想做定伏筆話一向好支持中小企有關擔保計劃，不過咁大間行，想賣乖真係要拎啲證據出嚟，睇吓過去一年幾，總共做咗幾多單先啦。
金占士