美國聯儲局主席伯南克重返校園，嚟緊兩個禮拜會返大學客席講四堂書，尋晚就去咗第一站喬治華盛頓大學，可以話歷屆主席從未試過咁做，係聯儲局公關攻勢另一新猷，可能係適逢下年係聯儲局成立100周年，伯南克實行省靚呢個世紀招牌！
伯南克做過普林斯頓大學教授，呢次破天荒巡迴lecture，唔會好似以前咁教學生經濟理論，純粹係聯儲局嘅公關騷！事緣民間成日批評聯儲局放鬆銀根過咗火位，尤其係有「聯儲局終結者」之稱、正競逐總統參選人嘅共和黨眾議員Ron Paul，受到唔少年輕人粉絲擁戴，難怪伯南克要親訪校園力挽聯儲局形象。
伯南克對於今次lecture隆重其事，上年十二月已開始做準備，自己落手落腳整PowerPoint。去唔到現場睇嘅話，可以上聯儲局網頁或者ustream.tv睇live，遲啲仲會post返聯儲局YouTube版面畀大家重溫添！伯南克唔少前門生對呢位師傅讚不絕口，話佢唔會口水多過茶，備課做得好足，而且佢嘅教員室門常開，對學生課餘請教無任歡迎。
另外，年初獲總統奧巴馬提名為聯儲局理事嘅兩位金融市場專家──前私募基金經理、老布殊年代做過財政部官員嘅鮑威爾，同埋財長蓋特納前顧問、哈佛經濟師嘅斯坦，尋晚向國會作證，二人分別具備金融市場實戰經驗及學術造詣，料為伯南克決策帶來莫大裨益。