月初公布業績的中信資源（01205），雖然盈利增長翻一番，但因為冇息派，市場反應唔多合皮，結果股價由高位1.45元跌至最低1.2元，不過好快已經搵到支持並回升，上周五收報1.3元。
近年油價持續高企，對主要從事石油開採業務的中信資源，提供有利經營環境，去年純利勁升1倍，至22.03億元，每股賺0.31元，即使撇除期內出售澳洲Macarthur煤礦的收益，核心盈利仍有54%增長。展望旗下哈薩克斯坦Karazhanbas油田及遼寧月東油田運作漸上軌道，盈利前景繼續樂觀。至於不派息問題，集團解畫係為咗未來收購作準備。睇番目前其手頭現金已過百億，相信出擊只是時間問題。
以現價計，中信資源市值達103億，但市盈率只係四倍鬆啲，睇番同類股，大隻過佢嘅中石油（00857）同埋中海油（00883），還是細隻過佢嘅MI能源（01555），PE起碼都講緊十倍樓上，難怪大行紛紛叫買，美銀同花旗分別睇1.8同1.9元，短線重返月初高位問題不大，阻力1.5元。
詩詩