孖妹缸湖遊：財圈特搜揭底牌

高妹：祺祺，話晒我喺魚缸界都浸淫咗差唔多四年，手機入面儲儲埋埋嘅財金名人電話冧巴，無一百都有五十個呀！不如今期搞啲新意思，搵啲魚缸界老友記，然後玩大踢爆囉？

祺祺：都好呀！近排係港股嘅業績期，可惜我啲蟹貨股價炒極都炒唔上，我都悶悶地，搵啲新嘢玩都唔錯呀！

金利豐金融研究部副經理黃智慧 私物大揭秘

海通國際中國業務部副總裁郭家耀 私物大揭秘

高妹：我有個提議，不如去玩直擊魚缸分析員嘅公事包同埋銀包吖，一嚟滿足吓八卦心態，二嚟睇吓佢哋嘅投資兼理財態度係點樣囉？

祺祺：幾得意喎！講多無謂，踢爆最實際，我哋一於出發喇！

直擊一號人物 金利豐金融研究部副經理黃智慧 低吸落後藍籌股

祺祺：你個袋仔咁細，返工都幾輕便喎！

　黃：係呀！因為我多數喺公司寫報告、寫專欄，亦會盡 量喺公司睇晒資料先放工，所以平時唔會帶太多公司嘢返屋企。你見我個銀包都放得唔多嘢，只得三張信用卡，同埋小量現金。我份人好穩陣，絕對唔會先使未來錢。

祺祺：咁你嘅投資態度又係點呀？

　黃：因為買股票要同公司申報，我唔想搞啲麻煩手續，所以依家主要月供兩隻基金，買中國股票同新興市場，另外都會定時定候換啲人民幣去做定期。我係穩陣型投資者，未來想儲筆40萬嘅首期去買樓，自住又好，當係實物投資都好。

祺祺：唔炒股都可以講股嘅！你點睇後市呢？

　黃：我覺得三月唔會有利淡大市嘅消息，港股應該幾穩陣，另外有好多藍籌股股價都落後咗，或者你都可以趁低買番啲，當係中、長線投資都唔錯。

私物大揭秘

公事包︰銀包、記事簿、化妝袋、卡片盒、眼藥水

銀包︰三張信用卡，四百蚊現金

祺祺評價：佢支唇彩隻色好靚呀，唔知買咗幾多錢呢？

直擊二號人物 海通國際中國業務部副總裁郭家耀 月供基金逼儲錢

高妹： 聽講你有好多張信用卡喎？

　郭： 十張左右喇，但常用得嗰四張，多數用嚟交費，可以儲分去換禮品。不過我好小心架，次次出完糧就會即刻找卡數。我嘅理財觀念係量入為出，平時喺支出方面減少啲，咁剩落嚟嘅錢就可以畀老婆去買股票喇！哈哈，同埋佢都鍾意買吓金條當投資，只要黃金啱價位，佢就會去買。

高妹： 嘩！足金金條唔平架！你一定又係話買股票要申報，所以去買基金喇？

　郭： 係呀，每個月我都會拎幾千蚊去月供基金，當係逼自己去儲錢。另外，咪都係投資人民幣同黃金囉！不過，我都想遲啲買多個單位，最好一個自住，另一個就收租。

高妹： 我見你個公事包都幾多「得意」嘢喎？

　郭： 其實我都無執過個返工袋，嗰兩本記事簿依家都無用。至於個卡通筆袋就係我讀中學時代嘅遺物，而把間尺都好有用架，我有時用嚟間吓啲年報，你知啲財務數字幾細隻o架喇！哈哈！

私物大揭秘

公事包︰上市公司刊物、筆袋、記事簿、間尺、MP3

銀包︰四張信用卡，一千蚊現金

高妹評價：估唔到佢會帶筆袋同埋間尺返工！（有點搞笑）

直擊三號人物 新鴻基金融資料研究部分析員李惠嫻 三成投資作短炒

祺祺： 我見你個袋都幾重喎！又有參考書，又有計數機。

　李： 因為我考緊CFA（認可財務策劃師），所以返工袋一定會帶參考書，等返工同放工時坐車可以有書溫習。有時個袋又會帶啲企業嘅年報，咁都會用計數機去計吓啲財務報表數字嘅！

祺祺：咁識為自己前途籌謀，我諗你嘅投資心得都好厲害。

　李： 扣除晒屋企家用、日常生活開支，我都會將其餘嘅錢用來做投資。但自從由財經記者轉咗做分析員後，我就轉為月供基金，同埋做人民幣定期。不過我都可以講吓以前嘅投資做法，就係用一套叫做「核心衞星資產配置」，即係將一份錢變成兩份，核心嗰份錢用於長線投資，買啲藍籌股同埋內銀股；衞星嗰份錢就主打短炒，或者買吓衍生工具咁。比例大約係前者佔七成，後者佔三成，我覺得呢個投資方法都幾好用架！

祺祺： 咁你係咪又想買樓呀？

　李： 係呀，我同男朋友都開始儲緊買樓首期，希望三年後每人各自都儲到50萬喇！

私物大揭秘

公事包︰銀包、參考書、計算機、卡片盒

銀包︰三張信用卡，五百蚊現金

祺祺評價：佢咁好學，大家話我係咪都要去考番個CFA呢？

祺祺： 唉！喺證券行做嘢真係慘呀，啲股票有得睇，無得炒！

高妹： 無辦法喇！鬼叫申報手續咁麻煩咩？不過唔炒仲好喇，咁佢哋做起分析上嚟咪客觀啲囉。

祺祺： 不過炒咗幾年股票，個荷包有縮無脹，我都開始心灰意冷，係時候要諗吓後路喇！

高妹： 嗱！你唔好做傻事呀，最多下期我搵個投資大師畀你取經，一於就咁話喇！下期再見。

若有料報畀高妹同祺祺或有嘢問，可電郵money.biz@opg.com.hk

高妹、祺祺