睇見隻博士蛙（01698）忽然變咗燒田雞，真係好難怪市場一直都唔肯除低對內地民企嘅有色眼鏡。總之炒股同睇人一樣，都係要聽其言觀其行。
尋日個別藥品股好似利君（02005）、李氏大藥廠（00950）同四環醫藥（00460）表現唔錯，升幅介乎2%至6%。詩詩之前亦推介過四環，集團在內地心腦血管藥物市場佔領導地位，由於收入60%來自獨家產品，故受降價令的壓力其實不大，截至去年六月的中期純利仍增長49.4%。集團早前更宣布其首隻達國際標準的自主研發抗高血壓專利新藥，臨床研究申請已獲內地受理，可見未來盈利能力仍然樂觀。
集團將於下周一（十九日）公布去年全年業績，股價本月初因市傳再有新一輪藥物降價令出台，一度跌返2.9元水平，但好快已收復失地，昨日升2.8%，收3.26元，可見承接力強。瑞信亦認為業績會優於市場預期，並指目前估值偏低，給予目標價4.5元。不妨以3.8元為目標跟進，支持位可定於3元。
詩詩