絲絲講場：星展周邦貴情迷李小龍
香港除咗係金融中心外，文化嘅影響力亦好深遠。星展香港零售銀行業務信用卡及私人貸款業務高級副總裁周邦貴（Ken），喺馬來西亞土生土長，但就話自己係李小龍嘅忠實粉絲，細細個已經好鍾意香港。舊年佢知道調嚟香港工作後，開心咗好耐。
講廣東話 難佢唔到
Ken鍾意香港嘅程度，真係有目共睹，連出名難學嘅廣東話都學埋，尋日佢仲堅持用廣東話，同絲絲同埋一班朋友溝通，話有親切感啲喎。Ken同絲絲講，佢同好多朋友都好鍾意睇香港嘅電視劇，加上讀書嘅時候，唔少朋友都講廣東話，久而久之佢就學曉咗聽，但喺廣東話嘅發音上，始終差啲。
其實Ken嘅廣東話已經進步神速，喺幾個月前佢識嘅詞彙唔多，形容詞主要都係「好好、唔太好」之類，但尋日阿Ken已經揮灑自如，仲識得唔少本土俚語添！
Ken曾喺馬來西亞、新加坡等東南亞地區工作過，比較之下，佢話香港嘅工時雖然係最長，不過香港同事工作態度就相當積極，令佢都分外有拚勁。