市場熱線：利豐貴得有道理

A股繼續冇起色，恒指埋單升45點，雖然火車頭仍係大笨象（00005）同和黃（00013），但扭轉乾坤則係靠祖國移動（00941），隻股中午派成績表之後，下晝開波仲跌多咗，喺兩點之前開始發力，個幾鐘頭內由低位急升接近3蚊，大戶近排攞呢3隻舞高弄低已經夠殺。

民企出事防不勝防

講番祖國移動，全年賺多5%已係預期接近上限，而冇提高派息比率亦係預期之內，但呢排成也941、敗也941，兩個瑞士佬分別睇101蚊同70蚊，4G前景可以任你講，傳聞速度可以快10倍，但攞兩、三年後嘅產品賣冇米粥即係得個吹字，古勝淨係知呢兩年3G業務會被其他兩間撳住嚟打。當然，買祖國移動收近4厘息，然後博兩年後財息兼收都咪話唔盞，但並非炒鬼嘅對象。

抽水就浪接浪，交行（03328）抽水566億人仔，雖然唔使向街外股東伸手，但點解要有咁大折讓？「田雞博士」（01698）突然反肚，民企股間唔中就整一劑杰撻撻，原來搵「四大」核數一樣會中招，至於睇有冇董事跳船已係慢咗一步，所以仍係防不勝防，睇吓自己好唔好彩。

內房股連跌兩日，但普遍只係微跌，只有重慶大地主中渝（01224）受政治地震影響跌得多啲，好多人覺得溫總只係口硬心軟，「繼續」調控可以有好多含意，政策唔加唔減已經得，其實冇新政策已係好消息，而地方政府亦會自動鬆綁。

受惠美國經濟復甦

美股隔晚已6連升，美債係咁跌，即係啲錢由債市游落金魚缸，美匯創11個月新高，依家淨係差樓市未掂，氣氛轉好最有利係零售，所以利豐（00494）借住花旗零售數據改善，有機會升破一月個頂。利豐由25蚊樓上碌落11蚊，到依家升番上18.6元，已經追番一半，以藍籌股咁樣大起大落法，只係得思捷（00330）有得揮。

買股票先揀市場，思捷坐過山車皆因孖屐對歐洲經濟由過度悲觀轉為樂觀，而祖國市場則由過度樂觀轉為悲觀，呢兩個市場都係鐘擺效應，但美國市場則係持續向好，連聯儲局會後聲明都已轉口風，加埋今年大選年例牌催谷經濟，所以買花旗市場嘅公司已經係成功嘅一半。

利豐下個禮拜四派成績表，呢排派成績表嘅大隻佬無論係符合抑或高過預期，股價表現都唔差。利豐一一年PE預計係28倍，喺貴價藍籌榜中應排喺前5位，但貴得有道理，一一年盈利係5字頭，一二年係7字頭，一三年係8字頭。利豐PE一向係貴，睇一二年數字已係唔貴。

古勝