豐盛金融資產管理部董事黃國英，三月初自掏腰包，喺灣仔伊館開咗個投資talk騷，加埋佢嘅造型，十足十黃子華棟篤笑咁，吸引咗成二千位股民買飛入場支持，成為投資界嘅熱門話題。
佢見個show反應理想，近日已經入紙向伊館book場，打算最快喺出年三月或五月間，再次踏上伊館舞台開騷，仲話要向同宗黃子華學習，讓獨創嘅talk騷，成為自己嘅生招牌添。
黃國英嘅投資talk騷同傳統投資講座嘅最大分別，在於佢喺分享投資心得之餘，不忘以輕鬆表達方式娛樂大家。佢尋日同絲絲講，為咗開騷，早前更特別向舞台導演拜師學藝，苦練talk騷技巧，又親力親為自度講稿。
埋單計數，場騷最終雖然要蝕成十幾萬，但係口碑唔錯。可能之前冇經驗，今次只係做一場，清場時間又用多咗，畀伊館罰錢，攞到呢啲經驗之後，認為連開兩場仲好，於是佢近日已經向伊館入紙book場，出年嘅talk騷希望做到兩日，以吸引更多觀眾入場添！
佢希望自己出年嘅表現可以更上層樓，更期望talk騷能夠吸引到更多贊助。即使未必可以靠talk騷賺番筆，亦都可以封到蝕本門吖嘛！