市場熱線：神華現價買平貨
港股4連升，祖國移動（00941）同埋和黃（00013）要抖氣，但到地主股同大笨象（00005）接力，大笨象今日除息例牌有搶息行動，而難得係標普期指喺亞洲時段升約6點，對尋晚嘅聯儲局會議似乎憧憬多過疑慮，道指如果升穿萬三點就一天都光晒，但最驚好似日經咁樣次次升到1萬點關口即回頭是岸。
呢排外圍變靜，今日人大閉幕可能係最後一次聽到溫總具有強烈「催眠」效果嘅公開講話，內地依家打個乞嚏都會令世界感冒，又放棄保八又貿赤創22年新高，但全球魚缸都係嚇一嚇又重拾升軌，其實亦唔係真驚，GDP官方目標唔使太認真，而先有入口（原材料）至有出口，所以魚缸只係搵藉口調整吓。
輪流炒主題唔易捉
尋日恒指大部分時間只係幾十點內橫行，日韓台魚缸朝早齊齊高開約1%，所以港股上升主要係跟住外圍，但A股轉跌為升兼高收則冇乜帶動作用，恒指收市升205點，收復埋10日同20日線，成交金額稍多過600億元，有多隻股票創52周新高，個市繼續輪流炒就有排未玩完，但要捉到「主題曲」唔係咁易，呢輪到4G股、濠賭股、半新股，而最多升兩、三日又散水。甜甜系「遺產」最巴閉，尋日隻癲瘋控股（00271）升到拉閘，公司話會賣資產，又會引起華懋注資嘅聯想。
炒業績股就各安天命，匹克（01968）就幾令人跌眼鏡，相比起361度（01361）賺少五成，匹克僅賺少5%直情要開香檳，但公司今年上半年定單已減兩至三成，體育用品股入帳方法好有「彈性」，所以要小心提防。匹克專攻籃球，算係市場定位較好嘅品牌，管理層話仲同林書豪傾緊合作，但隨住紐約人6連敗之後，「林瘋」熱潮亦好快冷卻。同炒股一樣，唔好見急升就人跟你又跟。
煤電一體策略成功
業績股無非係低潮買入、高潮散水，煤炭股呢排明顯落後大市，皆因電煤價格已經連跌咗3個月，但跌極都會有個底，上個禮拜價格已開始平穩，原因係大秦鐵路每年例牌維修影響運輸，瑞信尋日出報告認為今年煤價可維持喺每噸800蚊人仔，因為今年通脹回落，所以阿爺會減少干預，報告仲睇好神華（01088）同中煤（01898）。
雖然依家係用煤淡季，但煤價隨時見底反彈，尤其依家國際油價咁高，作為石油代替品嘅煤炭冇理由長期咁低迷，淨係煤化工行業已經好大需求。由於神華同中煤都係賣合約煤為主，所以喺煤價回落嘅時期，其穩健性應該好過兗煤（01171）。
中銀國際尋日亦出報告建議買入神華，原因係公司煤電一體化做得幾成功，今年電廠收入會顯著增加，但因煤價下跌所以調低目標價到38.77元。神華下個禮拜派成績表，一一年PE會降到12倍幾，一二年再降到10倍幾，趁煤價跌到底係買入機會。