市場熱線：中國南車全速前進
港股上個禮拜先跌3日、後升兩日，先穿4個關口（10日、20日、250日平均線同保力加通道底部），跟住又收復兩個，10日同20日線亦唔係差好遠。港股兩個幾月以來第一次有似樣調整，古勝亦被震走一半貨，如果今次真係回馬槍，二萬二嘅目標都要改寫。不過，古勝仍係維持兩個禮拜前意見，寧願炒股唔炒市。
ADR變動唔大，但上周五勁升嘅祖國移動（00941）再升近2%，折合港紙85.88元。中電信（00728）上周五開始賣「哎瘋」，本來祖國移動好蝕底，但「高佬盛」大力唱好佢又踩中電信，而睇好祖國移動原因係佢未來4G業務，果然高瞻遠矚。不過，新iPad都係攞4G做賣點，升呢可能快過預期。祖國移動舊年跌市搖身一變公用股托住個市，估唔到今年初升市仍係火車頭，可見大戶儲咗唔少貨。
空軍要搵新目標
花旗國非農職位增至超過22萬份，「一如預期」好過預期，但尾市希臘CDS裁定要賠錢令道指升幅收窄，其實希臘擺明大石責死蟹，技術上已係違約。至於班希債債主妥協亦係從理性角度出發，剃頭一半再換啲垃圾債都好過連渣都冇。希臘單嘢總算暫時過骨，未來要睇空軍會否轉移目標去葡萄牙，焦點亦會去番經濟數據。
內地周六公布埋進出口數據，一、二月加埋進口增長7.3%、出口增長6.9%，阿爺今年目標係GDP增7.5%、通脹4%、外貿增10%，前兩項指標唔難達到，但外貿就有啲懷疑，不過，航運股同碼頭股有唔少大行唱好，一三年會全面復甦咁話。至於二月CPI得3.2%低於預期，同時，頭兩個月零售額令人失望地增長得14.7%，汽車銷量亦都下跌，茅台話已跌價400蚊，CPI下降部分原因係消費力放緩。姑勿論係點，CPI一出又有人憧憬就快減存備率，但根據阿爺穩陣作風，古勝認為要等到年中。
業務可重返正軌
內地固定投資亦都縮咗，但今年稍後高鐵復工會有幫助，古勝一月中時曾推介過中國南車（01766），隻股其後亦突破咗5.5元阻力，高見6蚊樓上，上周五收報5.65元，趁住今個月派成績表兼今年前景轉佳，又可買入短線博10%左右上升空間，而長線更加唔拘。
南車已發咗盈喜，舊年全年可賺多5成以上，即係超過38億人仔，一一年PE約14倍，如果公司每年平均有兩成嘅增長率，股價已相當吸引。舊年高鐵意外搞到南車高位唔見一半，但意外其實係唔關車身同南車嘅問題。長遠睇，高鐵會逐步重返正軌，而地鐵同城軌鐵路係愈建愈多，海外定單待信心回復之後亦會係增長動力。
如果夠膽喺3蚊樓下撈南車嘅話，已經獲利1倍，但依家亦未算遲，因為南車今年會重新起步。