近期講到「爆」，唔使講梗係特首啦。識Prof. J都知，我好少講政治，但媒體問到你唔答又會話你冷淡，正所謂「香港是我家，怎捨得失去她」，穩定嘅政治環境確係有助香港嘅經濟發展。
媒體嘅着眼點係價值，用平民價錢坐過億遊艇，重點係價值問題，因為如果你唔係特首，何來有呢種等值呢？皇帝放假出巡，唔通我當你係平民百姓咩，係唔係？正所謂「人怕出名豬怕肥」，知錯望能改，好似本人偶像Eason隻舊歌──Shall we talk，唔掂傾到掂就好。
至於股市就仲爆，思捷環球（00330）盈利雖然倒退，但由於優於市場預期而照炒，淡友全部扯白旗，咁都得？阿里巴巴（01688）就仲好嘢，一招「芝麻開門明白了」，用咗大家五年平錢之後一變將公司以IPO價私有化，馬雲呢鋪真係抵到飛起，小股東都唔好用平均價，用加權平均我諗會開心小小囉。
近期發覺喺行家市場，原本有好多財經朋友透過不同頻道同我神交，真係合皮。早兩日與神交多時嘅姚浩然喺一個講座吹水，佢嘅低市帳率、低PE選股法確有根據。低市帳率令隻股跌到去某一個位跌無可跌，低PE撐佢一個小小增長可以支持股價。喺咁嘅市況，記住投資要有立場，咁爆上爆落都爆你唔死。
香港大學電子金融服務榮譽助理教授 徐燦傑