到底係美國人，定係中國人賺錢叻啲呢？呢個答案就要睇用邊個嚟做比較嘞。根據一項調查顯示，全國人大70個最「富貴」嘅代表，舊年財富增加值高達115億美元，超過美國國會全部535名議員、美國總統同佢嘅內閣、9名最高法院大法官嘅總和。
根據《2011年胡潤百富榜》數據顯示，70名最富有嘅全國人大代表，舊年財富淨值已經增加到898億美元，比前年多咗115億美元；而同期美國嘅行政、立法同司法系統660個高官，財富淨值都只係增加咗75億美元。嗰70個最有「米」嘅人大代表，比總統奧巴馬嘅幾百人班子，賺錢仲要叻得多添。
之不過人大代表嘅構成比較複雜，有學者、有官員，亦有各大小企業嘅老闆。至於最有錢嘅人大代表，仲可能包括埋港澳地區嘅大商賈，咁樣計法，難怪美國班高官同議員要投降咯。
余詩韻