踏入二○一二年，港交所（00388）人事變動好似特別多咁。繼主席夏佳理四月將退任後，就連上市委員會今年亦勢將大執位，最少有5名上市委員會會員將換人，因為佢哋都做夠6年任期，所以要離任，當中仲包括主席高育賢添。咁邊個接任上市委員會主席呢個咁重要嘅位？又成為市場議論紛紛嘅話題。
上市委員會一向被中環友講笑形容為係全香港「最值錢」嘅委員會，因為上市委員會擁有審批公司上唔上到市嘅大權。上市公司集資額動輒逾十億元計，上市委員會仲唔係好重要？
過去坐得上市委員會主席呢個位，全部都係猛人，包括張建東、鄭慕智、唐家成等等。高育賢本身亦都來頭唔小，佢曾經被封為全年最佳deal maker（交易撮合者），係富而德律師事務所中國區主管合夥人，二○○六年獲委任加入上市委員會，加入無耐就做副主席。
咁邊個有機會接任呢？絲絲冇水晶球，但依家上市委員會有兩名副主席，分別係胡關李羅律師行合夥人李嘉士、同美富律師事務所合夥人莫德華。兩人可唔可以「更上一層樓」，過多幾個月就知喇！
除咗高育賢外，今年「夠鐘」起身嘅仲有彭家樂，佢曾參選過港交所董事選舉。
余詩韻