市場熱線：五礦資源4蚊邊上車
大笨象（00005）同金錢龜（00011）成績表都好過預期，但港股尋日到兩點半突然散水，一度冧咗兩舊幾，唔通班大孖沙又跌眼鏡？業績公布後，英國象最多比香港收市價升1.8%，但其後跟住歐洲魚缸跌，比香港收市價倒跌逾1%，原因係嫌佢成本比率上升同埋一級資本比率下降，一份業績有幾十個數據，要雞蛋裏挑骨頭話咁易。
部分資金開始轉向
今日期指結算，都未知邊個食尾胡，呢排個市幾反覆，尤其尋日無厘頭下跌，都係小心為上，炒吓啲落後股好過。恒指自舊年尾開始一路沿住條10日線係咁上，尋日首次跌破有一定心理影響，國指更在呢個升浪中首次3連跌。古勝尋日已講過，隻象PE唔夠10倍、息率有4厘半，而歐債危機已經紓緩，可以吸引番啲長線投資者落疊。
大笨象估值要同全球各大錢莊比較，而世界性錢莊股又要睇住聽日嘅第二輪長期再融資操作（LTRO）規模，之前所流傳嘅1萬億歐元規模起碼要打個6折，皆因歐債危機已經冇咁緊張，外電話G20會喺四月向IMF注資2萬億美元，但孖屐亦已經冇乜反應，美匯指數一路回軟，歐元升到上1.34幾，港匯喺7.75幾冇乜點郁，但其實已代表偏軟。
A股連升7日，成交仲創10個月新高，香港嘅牛氣過咗畀祖國，尋日恒指跌189點，成交648億元。孖屐話追逐高風險投資，但尋日見煤氣（00003）、北控（00392）、置富（00778）、大快活（00052）呢類穩陣股齊創52周新高，反映資金有啲轉向，尋日連載通（00062）都炒埋。
「走出去」配合國策
汽車股尋日朝全線上升，但到尾得幾隻國產貨如吉汽（00175）、長汽（02333）同比亞迪（01211）掂，皆因今次係炒祖國公務車全線國產化，連合資車廠都要out。祖國不嬲話支持本土車，並非突然保護主義，個蛋糕話每年達千億人仔，舊年上半年國產車嘅比重只係得兩成，所以今次「獨食」就相當和味，亦唔怪得之吉汽同埋比亞迪之前升到你唔信，原來有春江鴨……
古勝喺個零月前推介過五礦資源（01208），現價升咗一成幾，比起其他二三線股冇乜特別，但期間已完成收購加拿大礦公司Anvil權益，亦即買起剛果一個銅精礦，公司同時話會繼續買嘢，對好多國家嘅金屬資產都有興趣，當然，最緊要係有水，作為上市公司，不免要向市場伸水，舊年傳過會引入中投，去海外掘礦係為咗配合國策，所以阿爺表面同暗地都會支持，所以股價亦要做得好好睇睇。
古勝覺得呢隻股長線要做大做強，做得五礦嘅海外旗艦唔會令人失望，但隻股呢排走勢同市況一樣牛牛皮皮，個市亦愈來愈多調整訊號，所以不妨等隻股回落到4蚊邊先考慮。
古勝