SOHO中國（00410）總裁張欣喺微博爆料話，屋企門口嘅味千拉麵閂咗嘞，聽講係業主狂加一倍租金；網友亦話北京有幾間喺地舖嘅味千拉麵執咗，全因租金升得太多。咁樣落去，第日大家咪要上四樓，甚至八樓去食麵囉。
味千（中國）（00538）好快就回應，並冇京城租金上漲而閂店嘅情況，通常係業主對租賃策略調整，佢哋就跟住改變。公司話佢哋喺北京有37間門店，去年就新開6間，今年會再開多7間，但冇提到執咗幾多間喺地面嘅門店。
據北京嘅連鎖餐飲業人士講，業者一直都有舖租壓力，新舊租金差好遠，閒閒地都加30至40%，想業主減租梗冇可能喇，只能夠力爭「加少啲」。網友亦話，依家喺北京開唔起地舖嘅餐廳愈來愈多，有時候出街搵嘢食，成日搵唔到招牌、睇唔到入口，都要搭𨋢㗎。
張欣眼見味千拉麵執埋，直覺北京好快就會變成東京咁，去餐廳都到四樓，又或者落地庫，因為佢哋畀唔起地面嘅租金，就連辦公室嘅租金亦升咗好多呀。