由巴黎到米蘭、由倫敦到紐約，一經過奢侈品牌名店，周不時會見到內地購物客。眼見奢侈品需求日增，內地企業當然明白肥水不流外人田嘅道理啦。內地自主奢侈品牌嘅上位戰，原來早已悄悄展開，部分甚至已經反銷歐洲。
以「美加凈」品牌出名嘅老牌國企上海家化，早喺○九年就已經找嚟蔣介石曾孫，台灣知名產品設計人蔣友柏合作，重新包裝已有百年歷史「上海雙妹」品牌，成為高檔奢侈品。就以「雙妹」嘅香水為例，每支售價最高達1,000元人民幣，定價較歐美一線品牌有過之而無不及。此外，上海家化嘅草本美護膚品「佰草集」，近年唔單止喺內地大賣，法國奢侈品巨人LVMH旗下嘅化妝連鎖店，更將「佰草集」運往歐洲銷售，成為內地奢侈品反攻歐洲嘅案例。
話時話，內地自主奢侈品牌嘅發展，同內地汽車市場嘅發展確有啲類似，事關內地汽車工業起飛之初，一直都是由外資主導嘅進口品牌主導，到近幾年自主品牌就如雨後春筍發展，就連外資公司亦要喺內地大搞自主品牌。
奢侈品市場原來亦有類似情況，就好以Hermes佢哋目前就喺內地特別成立名為「上下ShangXia」嘅新品牌，擺明車馬要以中國特色建立品牌賣點，一於以本土化策略力攻內地富人嘅消費市場。