身為創維數碼（00751）創辦人兼前主席嘅黃宏生喺○九年出獄後，近日再有大搞作，不過今次沾手嘅已經轉咗喺內地嘅汽車行業。據南京金龍客車製造公司嘅網頁簡介上就指，黃宏生出任公司董事長一職，而且仲話公司喺舊年經過重大重組之後，有強大嘅股東背景支持添。
黃宏生喺○六年因為串謀盜竊及詐騙創維數碼5,000多萬元等罪名，被判監6年。喺○九年獲保釋出獄後，一直維持低調作風，市場亦都揣測緊佢嚟緊會有咩搞作。期待咗兩年幾，近日有內地嘅傳媒《京華時報》就爆料指佢出獄之後，就創立了投資公司創源天地，之後更透過子公司聯同廈門金龍，同埋南京東宇汽車集團，簽咗一個關於南京金龍嘅重組協議。
報道話，南京金龍嘅獲增資嗰4,500萬元人民幣，主要係嚟自黃宏生，仲話佢今次聯手廈門金龍同埋南京東宇汽車集團，主要係想拎到汽車生產資源。翻查聯交所嘅資料，黃宏生同佢老婆林衛平仲持有創維數碼34.69%嘅股權，以尋日嘅股價去計，市值高達38.26億元，就算諗住用汽車生產呢個行業再度「東山再起」，亦都唔會缺錢啦！