點知歐盟嗰頭話有商量，呢頭就想轉移目標，有聲氣放出嚟話，歐盟又想抽航海碳排放稅喎！報道話歐盟財長會議講起，歐盟委員會將會喺今年六月，拋出全球航空同航海運輸行業碳排放稅嘅報價單，簡單嚟講，即係航海業都要抽埋碳排放稅！
巧立名目 幫補財政
唔使講自然又係噓聲四起，好似中國國家發改委就即時炮轟歐盟要求唔符合法律要求，違反咗國際公約同國際法原則咁話。有分析就話，歐盟之所以想抽碳排放稅，其實係歐洲各國呢輪荷包唔掂，所以想巧立名目抽稅幫補吓。今次遇到抵制，自然係死心不息，既然航空碳排放稅搞唔掂，就搞個航海碳排放稅出嚟，增加下談判籌碼，希望點都有樣錢落袋。歐盟呢招都算辣，睇嚟其他國家又要諗諗計喇！