港交所（00388）高層又有震盪！繼集團財務總監（CFO）黃森暉舊年底請辭後，港交所尋日又宣布，集團行政管理總監（CAO）馬俊傑已呈辭，將於三月中之前離職到外地發展。
心水清嘅朋友應記得馬俊傑係喺舊年六月底至上任，絲絲都冇印象同佢交換過卡片未，話咁快，唔夠九個月就拜拜，都算係來去匆匆嘅CAO。
其實CAO呢個位係港交所舊年新增嘅，主力負責監督主要項目嘅實施，並且直接向港交所行政總裁李小加匯報。
馬俊傑來頭唔小，喺金融服務業有成30年經驗，加入港交所前係Chi-X Japan嘅代表董事，主力推出買賣日本上市股票嘅另類交易系統。
外界本來諗住，近年備受黑池衝擊嘅交易所，可望借馬俊傑喺另類交易平台嘅經驗，協助港交所未來幾個重要合作項目嘅協調發展，好似場外結算、資訊技術系統提升同新一代數據中心等。可惜，馬俊傑話咁快就呈辭到外地發展。
至於財務總監黃森暉，加入港交所都唔係太耐，佢一○年七月加入，港交所一一年十二月宣布佢辭任，即將喺今年三月二十日離任，換言之，佢應可完成埋港交所舊年全年業績，至同港交所「分手」。
港交所近排咁多高層震盪，外界估計，隨着唔少高層即將約滿或者退休，高層離職可能陸續有嚟！
不過，正所謂「有人辭官歸故里，有人漏夜趕科場」，好快又會有新人上場，所以絲絲都見怪不怪。
余絲韻