呢排市況開始好番，開會又開到冇停手。近日周圍睇睇，發現唔少股份都有異動，業務良好就更加唔使話啦，大家話係咪？唔同股唔同升法，畀人炒起又係升，有潛質自己發展又係升！Prof. J就覺得，如果長線投資，就點都要睇公司嘅業務！
森信紙業（00731）主要業務係製造、貿易同銷售紙製產品，以及飛機零件貿易同相關服務，亦有提供物流服務同海事服務業務等等。集團優勝嘅地方，就係佢嘅規模效應！隨着多年發展，集團已獲得良好嘅垂直整合，供應鏈同顧客銷售方面都可以同時兼顧。喺紙品貿易同製造業務嘅企業嚟講，有咁樣規模嘅公司，森信都可算係本港唯一一間。呢種獨特嘅業務模式化身成為集團嘅競爭力，帶來非常厲害嘅協同效益，可以話正宗嘅「一條龍」。
近年，中國市場經濟穩步增長，對紙品需求當然龐大；大家諗得到嘅紙品公司，包括玖龍紙業（02689）等，可以發展到咁大，咪就係因為祖國嘅龐大市場。森信喺山東設有紙廠，地理位置優越，集團可吼準長江流域同京津地區嗰堆工廠嘅龐大紙品需求，谷大自己產品銷量。單以業務營業額睇，一○年紙品營業額同比增加22.5%，達45.73億元，以銷售量計，集團總共賣出75.5萬公噸紙品，同比上升7.5%。
睇番數據，集團市盈率約8倍，最近有異動，息率有2厘，進可攻退可守！繼續追蹤、出發！